Esparcia miawhag matubag kalangan pagkolekta sa basura

“KOMPLETO na ba ang 70 ka mga trucks nga mokolekta sa basura? Kun kompleto na, kulang pa ba ang 70 ka trucks kay nganong dili man gakatuman ang talamdam sa pagkolekta sa basura?”

Kini ang pipila ka mga pangutana ni Konsehal Bernie Esparcia, chairman sa Komite sa Climate Change, atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Iyang gibutyag ang mga nadawat nga reklamo gikan sa katawhan sa lain laing barangay sa syudad kalabot sa kalangan sa pagkolekta sa basura.

Matod niya nga daghan kaayo ang reklamo nga iyang nadawat gikan sa katawhan tungod kay matod pa wala matuman ang giluwatang talamdan sa pagkolekta ug gadapun-og na ang mga basura dinha kilid sa kadalanan.

“Adunay barangay nga usa na ka bulan nga wala makolekta ang ilang basura, Adunay nakolektahan, apan matod pa gipabayad sila tungod kay pribado ang nagkolekta ug daghan pang mga reklamo,” dugang sa konsehal.

Niini, siya namahayag nga masabtan man ang mga kakulangon sa tungod kay bag-o pa ang nakakontrata sa dakbayan nga magkolekta sa basura apan unta masayran ug madungog sa hintungdang komite sa konseho ang tukmang hinungdan sa kalangan sa pagkolekta sa basura aron mahisgutan ug mapangitaan sa solusyon.

Ang maong panawagan ni Esparcia giduso ni Bise Mayor Bebot Rodriguez ngadto sa Komite sa Environment ni Konsehal Roger Abaday ug Komite sa Panglawas ni Konsehal Malou Gaane.