Esparcia malaumon masulbad mga napasagdang proyekto sa kadalanan

Gikahingawa ni Konsehal Bernie Esparcia ang giingong dalan diha sa barangay Carmen nga matod pa gibangag bangagan ug morag napasagdan na.

Kini ang unod sa special report ni Esparcia sa sesyon sa konseho niadtong Lunes nga gidumala ni Presiding Officer Protempore Konsehal Edgar Cabanlas.

Matod sa konsehal nga adunay nag-post sa iyang timeline sa facebook nga nagreklamo kalabot sa dalan nga gibangagan nga matod pa dugay na nga proyekto kini kay aduna nay mga sagbot nga nanubo.

Buot sa konsehal masayran kun ang maong dalan nalangan lang ba sa pagtrabaho o nakansela na ang proyekto tungod kay kun tan-awon taod taod na ang proyekto tungod kay gitubuan nag mga sagbot ang bangag.

Hinoon, gikalipay ni Esparcia ang suporta ni Konsehal John Michael Seno, chairman sa komite public works, nga ipahigayon ang pagpakisayod sa maong proyekto ug pagtino sa tukmang kahimtang niini.

Ang atong gikinahanglan niini political will, pag-gusto daghan pamaagi, pagdili daghan og rason, pamahayag ni Esparcia.