Esparcia gitudlong dugang sakop sa komite sa Env’t

Mahimo nang makapartisipar sa mga hisgutanan kalabot sa kinaiyahan si Konsehal Bernie Esparcia.

Kini human ang konseho sa syudad sa sesyon niadtong Lunes nga gidumala ni Presiding Officer Protempore Konsehal Edgar Cabanlas mitudlo ni Esparcia isip bag-ong regular nga miembro sa komitiba sa environment subay sa gisagop nga resolusyon alang sa maong katuyuan.

Ang komite sa environment mao ang gitahasan pagtuon, pag-imbestigar ug pagtaho sa mga lakang o’ sugyot balaodnon o’ resolusyon kalabot sa kalimpyo, ekolohiya ug natural resources, pagproteher sa kinaiyahan, eksplorasyon, pagkonserba sa natural resources lakip na ang pagpreserba, pagproteher sa kasubaan ug kadagatan sa syudad.

Mahinumduman nga si Esparcia bisan og dili pa sakop sa komite daan nang gatambong ug gapartisipar sa mga hisgutanan kalabot sa isyu ug programa sa kinaiyahan ug ang iyang presensya dako kaayo og kontribusyon dinha sa pagkab-ot sa tukmang mga lakang.

Ang resolusyon nga gisagop sa konseho alang sa maong katuyuan gipangamahanan ni Konsehal Roger Abaday, chairman sa komite sa environment.