Esparcia gitinguha makapanday og ordinansa nga makatabang sa RACU-10

GITINGUHA ni Konsehal Bernie Esparcia, chairman sa komite sa climate change adaptation and mitigation and disaster risk reduction, nga matabangan ang buhatan sa Regional Anti-Crime Unit (RACU) pinaagi sa pagpanday ug balaod sa katuyuan nga mapakgang ang mga insidente sa cybercrime sa Rehiyon-10, ilabi na dinhi sa dakbayan tungod kay namatikdan nga daghan ang panghitabo sa cybercrime apan wala man lang kaabot sa 50% ang napasaka nga kaso.

Kini ang gipaambit nga panahum ni Konsehal Esparcia atol sa sesyon niadtong lunes nga gidumala ni Bise Mayor Bebot Rodriguez diin dinapit nga bisita ang bag-ong hepe sa Regional Anti-Crime Unit nga si P/Lt. Col. Casan Ali.

Sumala ni Esparcia nga basin kini ang rason nga daghan pa gihapon ang mga gapangilad sa online kay walay napasakaan sa tukmang kaso diin kutob lang sa blotter ang mga biktima apan dili na modayon sa pagsumbong sa kaso.

Niini gihangyo sa konsehal ang buhatan sa RACU-10  nga  mosumite sa ilang rekomendasyon sa Konseho ug unsa nga ordinansa ang angayan ipalabang nga sibo sa ilang matang sa operasyon.