Esparcia dismayado sa kalangan sa drainage project sa Bugo

“Mogasto kita og milyones sa pagpatuman sa proyekto apan tungod lang sa usa ka tawo malangan ang pagtibawas niini.”

Mao kini ang pamahayag ni Konsehal Bernie Esparcia atol sa tigom sa Komite sa Public Works sa miaging semana nga gidumala ni Konsehal John Michael L. Seno human gituki ang sulat sa chairman sa Task Force Demolition kalabot sa giingong usa ka straktura nga nakababag sa gitrabahong drainage project sa Department of Public Works and Highways (DPWH) diha sa National Highway sa Barangay Bugo.

Gipasabot sa konsehal nga angayan nga seryosohon ang maong mulo ug hatagan sa tukmang pagtagad sa mga opisyal sa barangay.

“Atong nasayran nga walay business permit ang maong establisamento maong tataw kaayo nga nakasupak gayud kini sa balaod sa syudad,” sumpay ni Esparcia.

Niini, malaumon ang konsehal nga maaksyonan sa daling panahon ang maong isyu aron mapaabot ngadto sa mga nakalapas sa balaod nga tinud-anay gyud ang Cagayan de Oro sa hingpit nga pagpatuman sa mga balaod.

“Kung dili kita molihok mahimong walay pulos ang proyekto,” pamahayag ni Esparcia.