Esparcia: Dili na tourist-friendly ang Macahambus Cave

GIKAHINGAWA ni Konsehal Malvern Esparcia, chairman sa komite sa climate change adaptation and mitigation and disaster risk reduction, ang sitwasyon sa usa sa mga historical sites sa syudad nga mao ang Macahambus Cave.

Dili na kini matawag nga tourist-friendly, matod sa Konsehal human madiskubrehan nga nanimaho na kini ug adunay nakitang  mga condom ug drug paraphenalia sulod sa maong langob.

Sa iyang special report atol sa sesyon niadtong Lunes nga gidumala ni Bise Mayor Bebot Rodriguez, si Esparcia mitaho nga sa ilang gihimong ocular inspection ug pag-imbistigar sa dapit, nasuta nga  adunay mga indibidwal nga nasapon nga nagbuhat ug malaw-ay nga kalihukan sulod sa maong langob ug  kini nagpakita sa kakulang sa pagtagad ug suporta nga nakaapekto sa kahimtang sa maong dapit.

Malaumon si Esparcia nga tagaan kini ug prioridad ug pagtagad sa mga nagdumala sa syudad aron mabalik ang kanhi kanindot sa Macahambus Cave aron mapadayon ang kasaysayan ug turismo niini.

Nunot sa maong taho gisugyot ni Esparcia ang pagpalabang sa resolusyon nga mag-ahat sa City Tourism Office sa pagpatahom sa  Macahambus Cave aron kini mahimong sustainable tourist destination sa syudad.

Giduso ni Bise Mayor Bebot Rodriguez ang maong taho ngadto sa komite sa turismo ni Konsehal Jay Roa Pascual alang  sa tukmang aksyon ug rekomendasyon. (MLRapanot/SP)