Esparcia buot masayod sa kapasidad sa CEO pagpahigayon og de-clogging

GUSTONG masayod si Konsehal Malvern Esparcia, Chairman sa Komite sa Climate Change Adaptation and Mitigation, sa kapasidad sa opisina sa kawani ug ekipo sa City Engineering Office panahon nga himoon ang simultaneous de-clogging sa kabarangayan sa syudad.

Kini ang gipaambit nga panahom ni Konsehal Esparcia atol sa tigom sa komite sa Urban & Rural Poor and Housing Development nga gidumala ni konsehal Edgar Cabanlas.

Sumala ni Esparcia nga importante ang papel sa City Engineering Office panahon sa pagpanghinlo sa mga drainage ug canal sa kabarangayan hinungdan nga buot niyang mahibal-an ang kakulangon sa maong buhatan aron mapangitaan og paagi.

Samtang giangkon sa kawani sa maintenance department sa CEO nga  sa pagkakaron aduna silay kakulangon sa trabahante tungod kay napulo lang ka kawani ang nadugang sa ilang opisina ingon man sa mga ekipo sama sa backhoe ug uban pa nga dili makasarang sa tanang barangay sa syudad panahon sa declogging.

Niini, malaumon si Konsehal Esparcia sa panabang ug kooperasyon sa mga opisyal sa barangay ingon man ang ubang mga ahensya sa goberno national aron makab-ot ang tinguha nga malikay ang syudad sa posibleng grabeng pagbaha ning panahon sa ting-ulan.