Emano pabor malakip FSL sa school curriculum

HUGOT nga gisuportahan ni Konsehal Yvy Emano ang lakang masukip sa curriculum sa mga tunghaan ang Filipino Sign Language (FSL).

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez mipasaka sa resolosyon nga naghangyo sa kadagkuan sa Department of Education (DepEd), Commision on Higher Education (CHED) ug Technical Education and Skills Development Authority (TESDA) nga masukip ang FSL isip usa sa mga subjects sa curriculum sa kursong education, nursing/medical courses, criminology ug uban pang vocational courses.

Matud ni Emano nga gikonsulta ug gipaabot niya kang Director Desiderio Apag sa CHED ang tinguha nga malakip ang Filipino Sign Language sa curriculum atol sa gihimong Consultative Meeting niadtong Pebrero 16 ning tuig ug gibutyag nga mahimong maduso ang maong lakang ngadto sa CHED technical panel aron mapahigayon ang tukmang pagtuon.

Taliwala nga gikinahanlan pa sa buhatan sa CHED ang igong panahon ako malaumon nga magmalampuson kini nga tinguha tungod ug alang sa kaayuhan sa kinabag-an, dugang pamahayag sa konsehal. Ang resolosyon nga gipalabang sa konseho alang sa maong katuyuan gipaluyohan sa komite sa social services ni Konsehal Girlie Balaba, komite sa edukasyon ni Konsehal Suzette Magtajas-Daba ug komite sa pamalaod ni Konsehal Ian Mark Nacaya.