Emano nangusog ma-rehabilitar open drainage sa kabarangayan

Gikabalaka ni Konsehal Yevonna Yacine “Yvy” Emano nga moresulta hinoon sa pagbaha, mapuy-an sa lamok ug delikado sa aksidente sa mga motorista kun pasagdan nga abli ang mga kanal sa kadalanan sa pipila ka barangay sa syudad.

Kini ang unod sa iyang special report atol sa sesyon sa konseho sa syudad niadtong Lunes nga gidumala ni Bise Mayor Jocelyn Rodriguez.

Matud sa konsehal nga iyang namatikdan ug gikabalaka nga adunay pipila ka barangay nga napasagdan ang ilang mga drainage canal nga posibleng magdala og kaalaotan sa katawhan ilabina panahon sa sunod sunod nga pag-ulan.

Gani, gihimo ang mga kanal aron makatabang nga maka-control ang mga pagbaha apan dili na maayo kun mahimo kining hinungdan sa pagbaha, sumpay ni Emano.

Niini, iyang gisugyot nga ma-rehabilitar ang tanang abli nga mga kanal sa kabarangayan alang sa kapaseguroan sa katawhan sa dakbayan.

Ang taho ni Emano giduso ni Bise Mayor Rodriguez ngadto sa komite sa public works ni Konsehal John Michael Seno alang sa tukmang aksyon ug rekomendasyon.