Emano nagpasalamat sa Philseven Foundation Inc. sa laraw pagdonar community playground

GIDAYEG ug gipasalamatan ni Konsehal Yvy Emano, Chairman sa Komite sa Senior Citizens sa Konseho, ang Philippine Seven Foundation Inc. sa ilang laraw  pagdonar og balor  P1 Milyon nga Community Playground Park dinhi sa dakbayan.

Kini human si Anecia Tongson sa City Social Welfare and Development Department (CSWD) mipahibalo nga ang Philseven Foundation Inc. nangita og 120 metros kwadrados nga luna sa  sentrong bahin sa syudad aron ilang tukuran sa maong fasilidad.

Ila kining butangan sa mga outdoor equipments alang sa maong katuyuan, dugang ni Tongson. Sa iyang bahin, gi-welcome ni Patrick Gabutina, focal person sa Project Lunhaw, ang maong  tanyag ug misaad nga iya kining isukip sa Project Lunhaw.

Sumala ni Konsehal Emano nga dalaygon kaayo ang maong mga tanyag tungod kay mapahimuslan man kini sa katawhan.

Niini, gihangyo ni Konsehal Emano si Tongson nga makig coordinate kang Gabutina alang sa maong katuyuan aron mahatagan kini sa katumanan ug dili pud masayang ang maong kahigayonan.