Emano nagpaluyo sa mga programa sa dakbayan

HUGOT nga gisuportahan ni Konsehal Yvy Emano ang mga programa sa kasamtangang administrasyon ni Mayor Rolando “Klarex” Uy. Kini human nakita sa konsehal nga tutok ug sentro ang pagtunol sa serbisyo ngadto sa ubos nga hut-ong sa katilingban nga maoy iyang gitunguhang matabangan sa ilang panginahanlan. Gikalipay ni Emano ang Klarex nga Serbisyo sa Barangay (KSB) diin dili na kinahanglang ang katawhan ang modangop sa gobyerno kun dili ang serbisyo sa lokal nga kagamhanan maoy dad-on ngadto sa mga barangay sama sa libreng medical ug dental consultation, paghatag sa mga binhi alang sa mga mag-uuma, libreng tambal, libreng kasal ug uban pa. Malaumon si Konsehal Emano nga magpadayon ang programa tungod kay kaakohan sa mga piniling opisyal nga magserbisyo ug moalagad sa katawhan. Sa laing bahin, ang konsehal mitunol og ginagmay nga ayuda ngadto sa mga biktima sa sunog sa Sitio Hillside, Barangay Lapasan ug Ramonal Village, barangay Camaman-an. Dako iyang panghinaut nga bisan sa ginagmay nga ayuda mahupay ang nasinating kalisdanan sa mga biktima sa kalamidad.