El Niño padayong gipangandaman sa climate change comm

PADAYONG gipangandaman sa Komite sa Climate Change Adaptation and Mitigation and Risk Reduction, ubos ni Konsehal Malvern Esparcia, ang nagsingabot nga El Niño.

Kini agig pagsanong sa  giluwatang Memorandum Circular No. 2023-065 sa Department of Interior and Local Government kon Mitigation  and Preparedness Measures for the El Nino Phenomenon 2023.

Mahinumdoman  sa  tigom sa komite  sa miaging semana, ilang gipatawag   ang mga kapitanes sa hinterland barangays  aron  madungog ang ilang mga  problema  ug sentimento.

Nasayran nga adunay kakulangon sa kagamitan sa pag-uma ug panubig nga nakaapekto sa pananom sa mga mag-uuma.

Mipasabot usab ang mga kapitanes nga karong panahon sa ting-init ang backyard gardening lang ang kasagaran mahimo  sa mga mag-uuma  kay  mas sayon  raman nila ang pagbunyag  kompara sa kon dako ang  ilang tikaron.

Sa ilang bahin, ang buhatan sa City Agriculturist namahayag nga aduna  silay gihimo karon nga mga lakang  pagtubag  sa maong  panghitabo sama sa  pag-instalar og  solar power, pag-implementar sa mga spring development ug pang apod-apod  og mga semilya  ingon man fertilizers ngadto sa mga mag-uuma.

Niini, gihangyo ni Esparcia ang maong buhatan alang sa kanunay nga pagkoordinar ug pag-update sa komite sa mga kalamboan.