Ecological solidwaste mgmt law sa Cugman aprobado sa konseho

HAYAN maplastar ug mapalapdan sa konseho sa Barangay Cugman ning syudad ang ilang programa sa kalimpyo sa palibot ug hustong paglabay sa ilang mga basura.

Kini human ang konseho sa sesyon niadtong Martes nga gidumala ni Presiding Officer Pro Tempore Konsehal Romeo Calizo misagop og resolusyon nga nag-uli sa ordinansa sa Cugman nga gitawag og “An ordinance for an ecological solid waste management, prohibiting acts, providing penalties for violations and for other purposes”.

Kini nga ordinansa gimugna subay sa Akta Republika No. 9003 kon Ecological Solid Waste Management Act of 2000 ug alayon sa Chapter 3, Section 389 sa Local Government Code of 1991 nga nag-ila sa papel sa mga barangay diha sa paghatod og efisyente, efektibo ug ekonomikanhon nga pagdumala sa implementasyon sa mga balaod ug regulasyon nga may kalabutan sa pagkontrol sa pulosyon ug proteksyon sa kinaiyahan labina sa solid waste management.

Sa maong ordinansa, gihiusa ang paningkamot sa katawhan ug gobyerno ingon man sa tibook katilingban alang sa tukmang paglabay sa mga basura samtang gitinguha nga makahatag kini og benepisyo sa panglawas ug sa kinaiyahan.

Niini, ang barangay magtukod og Material Recovery Facility nga maoy modawat sa mga segregated waste segun sa waste classification alang sa katapusang pagbahin bahin sa basura samtang ang mga residual, non-recycable ug non-reusable nga mga basura dalhon sa sanitary landfill alang sa tukmang paglabay. Ang resolusyon nga gisagop sa konseho alang sa maong katuyuan gipaluyuhan sa komite sa Barangay Affairs ni Konsehal Yan Lam Lim ug komite sa pamalaod ni Konsehal Edgar Cabanlas.