e-Monitoring Project sa ALS suportado sa konseho

GIILA sa Kagamhanan sa Syudad ang panginahanglan sa pagpauswag sa mga kahigayonan sa edukasyon alang sa kabatan-onan ug niadtong dili makasulod sa tradisyonal nga mga institusyon.

Kini human hiniusang giuyonan sa konseho atol sa sesyon niadtong Lunes nga gidumala ni Bise Mayor Bebot Rodriguez ang resolusyon nga nagrekognisar ug nagsuporta sa e-Monitoring Project, ang online platform alang sa Alternative Learning System (ALS) ug Out-of-School Youth (OSY).

Mahinumdoman nga ang Alternative Learning System usa ka praktikal nga alternatibo sa pormal nga pag-eskwela ug naghatag og mga oportunidad sa out-of-school youth sa pagpalambo gamit ang mga batakang kahanas ug pagkompleto sa batakang edukasyon.

Ang e-Monitoring project nagtumong sa pagkolekta sa baseline data, data analytics ug data visualization alang sa kahibalo sa paghimog desisyon, lakip na niini ang pagplano ug pagpatuman sa mga programa sa ALS sa dakbayan.

Ang paggamit sa data driven decision making nahiuyon sa panglantaw sa siyudad sa pagpasiugda sa kompletong edukasyon ug paghatag gahom ngadto sa marginalized sector sa katilingban.

Ang gisagop nga resolusyon alang sa maong katuyoan gipangamahan ni Konsehal Suzette Magtajas-Daba, chairman sa Komite sa Education.

Malaumon si Konsehal Magtajas-Daba nga walay kabatan-onan nga mapihig sa kahigayonan nga makaangkon og batakang edukasyon nga gitunol sa dakbayan.