Dugang proyekto sa Brgy. Camaman-an mapatuman na

HAYAN mapatuman na sa Barangay Camaman-an ang dugang mga programa ug proyekto nga ilang gihan-ay karong tuiga.

Kini human ang  Konseho sa syudad atol sa ilang sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ilang ordinansa sa barangay diin nasukip ang ilang Supplemental Budget nga adunay gibanabanang kinitaan ug galastuhon balor P4,264,424.00.

Lakip sa gipundohan mao ang pag-rehabilitar sa ilang Barangay Health Center (main) balor P800,000.00 ug ang Barangay Health Center nga nahimutang sa Sitio Bontong balor P200,000.00 samtang P50,000.00 usab ang gigahin nga pundo alang sa pag-rehabilitar sa ilang Multi-Purpose Hall sa Sitio Mahayag sa maong barangay ug uban pang mga programa nga gilantawng maghatag kaarangan sa ilang serbisyo ngadto sa katawhan.

Ang 2024 supplemental budget sa Barangay Camaman-an miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho alang sa maong katuyuan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.