Dugang programa, proyekto sa Bulua mapatuman na

KAPIN sa P6.5 Milyones nga mga gihan-ayng dugang programa ug proyekto sa Barangay Bulua ang mapatuman na.

Kini human ang konseho sa syudad sa sesyon niadtong Lunes nga gidumala ni Bise Mayor Bebot mipalabang sa resolusyon nga nag-uyon sa gidusong ordinansa barangay nga may kalabutan sa ilang Supplemental Budget No. 1 sa General Fund balor P6,594,241.76.

Lakip sa gipundohan mao ang pag-improbar sa ilang multi-purpose center sa Zone-10 balor P500,000.00, pagpalit sa lote sa Lower Zone-2 balor P200,000.00, pag declogging sa mga drainage sa mga sitio ug zona sa dapit balor P 200,000.00 ug ubang pang mga programa nga gilantawng maghatag og dugang kaarangan sa ilang serbisyo ngadto sa katawhan.

Ang ordinansa sa Barangay Bulua miagi sa makuting pagtuon ug deliberasyon  sa mga hintungdang  komite sa konseho ug nasuta nga nahiuyon sa balaod ug mahimo nang ipatuman  sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.