Dugang molopyo sa Cagayan de Oro makapahimulos sa housing program

NATUMAN na ang damgo sa 56 ka mga molopyo sa syudad nga makaangkon sa ilang kaugalingong pinuy-anan.

Kini human ang komite sa urban and rural poor and housing development ni Konsehal Edgar Cabanlas, uban sa opisina sa City Housing and Urban Development Department (CHUDD), sa milabayng semana mitunol sa entry passes aron pormal nang mabalhinan ang ilang panimalay.

Sumala ni Cabanlas nga ang maong programa dako og tabang sa katawhan sa dakbayan ilabina niadtong mga walay balay ug yuta nga gitawag og informal settlers.

Sa iyang mensahe, dako ang pasalamat ni Cabanlas sa padayong pagsuporta ni Mayor Klarex Uy sa socialized housing program sa dakbayan diin usa usab kini sa gitinguha sa iyang pamuno-an nga makahatag ug maserbisyohan ang mga katawhang kabus.

Dako ang paglaum ni Cabanlas nga daghan pang mga pamilya ang matunolan ug makaangkon ilang ilang kaugalingon ug desenteng pinuy-anan. (SP/MLRapanot)