Dugang mga tunghaan matukod dinha sa 3 brgys

Gipaabot nga mapalit karong tuiga ang luna balor P40 milyones nga tukoran og dugang mga tunghaan dinha sa kabaranggayan sa syudad.

Kini ang nasukip sa giaprobahang 2023 Annual Investment Plan (AIP) sa konseho sa syudad ubos ni Bise Mayor Bebot Rodriguez.

Ang maong mga proyekto nga pundohan ubos sa Special Education Fund (SEF) naglakip sa pagpalit sa 20,000 metros kwadradong lote nga tukuran sa Macapaya Integrated School samtang 10,000 metros kwadrado usab ang loteng paliton alang sa Upper Tignapoloan Elementary School ug Bulao Elementary School.

Niini, si Konsehal Suzette Magtajas-Daba, chairman sa komite sa edukasyon, mipasalamat sa administrasyon ni Mayor Klarex Uy sa mga maayong paglantaw alang sa hayag nga kaugmaon sa kabataan sa dakbayan.

Malaumon si Konsehal Suzette nga pinaagi sa pagtukod og mga tunghaan dinha sa kabaranggayan daghang kabataan ang makaangkon sa hayag nga kaugmaon.