Dugang mga proyekto sa Brgy. Lumbia hayan mapatuman na

HAYAN mapatuman na ang dugang mga proyekto sa Barangay Lumbia nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang Supplemental Budget No. 1 balor P 5,323,803.

Lakip sa gipundohan mao ang pag-improbar sa ilang Multi-Purpose Hall Building balor P 1,160,598 samtang P 1,150,000 ang gigahin alang sa pagpalit sa sakyanan aron magamit sa tanan matang sa panginahanlan; P 200,000 usab alang sa pagpatrabaho sa ilang session hall CR ug uban pang mga programa ug proyekto nga gilantawng maghatag dugang kaarangan sa ilang serbisyo ngadto sa katawhan.

Ang 2024 supplemental budget sa Barangay Lumbia miagi sa makuting pagtuon sa mga komite sa konseho ug nasuta nga haom kini sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyuan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.