Dugang mga programa mapatuman sa brgy Patag

Dugang serbisyo ug mga programa ang mapatuman sa Barangay Patag sa nahabiling bulan ning tuig 2022.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop sa resolusyon nga nag-uli sa ordinansa sa barangay diin nasukip ang Supplemental Budget No. 1 (SB1) nga adunay gibanabanang kinitaan ug galastohon balor P3,621,800.71.

Tipik sa gigahinan sa maong SB1 ang pagpalit og ekipo, pagtukod sa proyektong infrastraktura ug mga galastohon sa ilang operasyon alang sa dugang serbisyo sa ilang katawhan.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya.