Dugang mga benepisaryo sa Piso-Piso Program nakadawat sa titulo sa yuta

MALIPAYONG gipahibalo ni Konsehal Edgar Cabanlas, chairman sa komite sa urban & rural poor and housing development, nga laing hugna sa pagpanghatag sa mga titulo sa yuta ang gihimo niadtong milabayng semana diin 30 ka titulo sa yuta ang gitunol ngadto sa mokabat sa 60 ka pamilya.

Sumala ni Cabanlas nga walay hunong ang ilang paningkamot bisan paman sa krisis nga giatubang tungod sa pandemya dili mahunong ang programa sa gobyerno lokal kay damgo ug pangandoy niini nga masilbihan ang mga kabus sa syudad.

Sa iyang mensahe, si Konsehal Edgar Cabanlas mipadangat sa iyang dakong pasalamat sa mga kawani sa City Housing & Urban Development Department CHUDD ubos ni Engr. Ermin Stan Pimentel ug sa Task Force for the Emancipation of Piso-Piso beneficiaries ni Engr. Armen Cuenca sa ilang pag-abag ug paningkamot nga magmalampuson ang programa.

Dako usab ang pasalamat sa konsehal ngadto ni Mayor Oscar Moreno ug sa iyang mga kauban sa konseho ubos ni Bise Mayor Kikang Uy sa walay puas nga suporta aron mapadayon ang programa ug mahatagan sa kaugalingon yuta ang mga kabus nga molopyo sa syudad.

Niini, si Cabanlas naningkamot ug nanghinaot nga ang tanan nga mga benipisiaryo sa Piso-Piso Program makaangkon sa titulo sa yuta nga maoy tinguha sa administration.