Dugang kaugmaran sa edukasyon sa mga iskolar sa CDO gilantaw

Gilantaw nga maangkon sa mga iskolar sa dakbayan ang dugang kaugmaran ug kaarangan sa ilang kinabuhi.

Kini human ang Konseho sa Syudad sa sesyon niadtong Lunes nga gidumala ni Bise Mayor Bebot Rodriguez mipalabang sa ordinansa nga naghatag og katungod ni Mayor Klarex Uy pagpirma sa Memorandum of Understanding (MoU) tali sa Cru (Crusade) Northern Mindanao (Cru-NorMin).

Ang kasabutan naglangkob sa kolaborasyon alang sa online o’ face-to-face seminar sama sa mentoring, coaching ug spiritual development alang sa mga iskolar sa dakbayan. Sa MoU nakalatid nga ang Cru-NorMin ang magpasiugda og online seminars, maghatag og resource person ug uban pang technical assistance alang sa maong kalihokan.

Samtang ang kagamhanan maoy maghatag ngadto sa Cru-NorMin sa suporta sa manpower pinaagi sa buhatan sa CDO City Scholarships Office uban sa kapasigurohan sa tukmang datus sa mga partisipante. Nasayran nga ang Cru-NorMin usa sa mga rehiyonal nga sanga sa Philippine Campus Crusade for Christ.

Si Konsehal Suzette Magtajas-Daba, kinsa nagpaluyo sa maong ordinansa, malaumon nga ang pagahimoong seminars makatabang sa mga iskolar nga makalahotay hangtod makahuman sa ilang pangtungha ug maangkon ang kalampusan sa ilang kinabuhi.

Ang ordinansa nga gipalabang sa konseho alang sa maong katuyuan gipaluyohan usab sa Komite sa Pamalaod ni Konsehal Edgar Cabanlas.