Dugang kalamboan sa serbisyo matagamtaman sa Macasandig

HAYAN matagamtaman sa katawhan sa Barangay Macasandig ang dugang kalamboan ug kaarangan sa  serbisyo.

Kini human giuyonan sa  konseho sa sesyon niadtong Lunes nga gidumala ni Bise Mayor Bebot  Rodriguez ang  resolusyon nga nag-uli sa ordinansa sa  maong barangay nga may kalabotan sa ilang 2024 Annual Budget  nga adunay gibanabanang kinitaan ug galastohon nga mokabat sa ₱28,138,212.

Lakip sa gipundohan ug gihatagan sa prayoridad sa  maong budget ang pagtukod og drainage system dihas  Gines Area ll, Villarino I, Lupiba III, Cabacungan area II,  Buena Oro Block 1, Wabe Compound,  Tibasak Zone 2, Sitio Pangandoy, Buena Oro Covered Court, Macasandig Elementary School ug Ormillada Compound III.

Gipundohan  usab  sa barangay  ang pagtukod og pathways dihas  Tambo Gines area, Tambo Paasa area, Promise Land area, Mandumol area, St. Ignatius Galamgam area, Sunshine Abadies area ug Tabian Compound.

Migahin usab ang barangay og igong pundo alang sa paghinlo sa mga kanal, pagpalit og 1 ka unit nga dump truck, Youth Development Program sa Sangguniang Kabataan, Barangay Disaster Risk Reduction and Management Framework nga magamit panahon sa kalamidad ug uban pang programa nga makahatag kaarangan sa kinabuhi sa katawhan.

Ang resolusyon nga gisagop sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug Komite sa Palamaod ug Reglamento ubos ni  Konsehal Edgar Cabanlas.