Dugang kalamboan sa sanitary landfill gilantaw

Paborableng giuyonan sa komite sa environment and natural resources ni Konsehal Roger Abaday ang sugyot ordinansa nga maghatag og katungod ni Mayor Rolando Uy pagpirma sa Memorandum of Agreement (MoA) ug Deed of Donation (DoD) tali sa Department of Environment and Natural Resources (DENR-10) ug kagamhanan sa dakbayan sa Cagayan de Oro alang sa Preliminary Disinfection and Storage (PDS) facility nga gidonar sa DENR-EMB pabor sa Sanitary Landfill dinha sa Sitio Baracan, Barangay Pagalungan ning syudad.

Sa maong MOA ang ahensya midonar og usa ka unit nga 20-foot container nga adunay 63 ka yellow bins ug 100 litro nga kapasidad ug 3,150 ka yellow trash bags ug uban pang miscellaneous items.

Sa tigom sa komite niadtong Martes, gipasabot sa representante sa ahensya nga tumong sa maong lakang nga makahatag og suporta diha sa pag-establisar sa PDS facilities nga magpalambo sa koleksyon sa Covid 19 related healthcare waste gikan sa mga quarantine facilities ug vaccinations sites.

Si Konsehal Abaday hugot nga mipadayag sa iyang pasalamat sa ahensya tungod kay nalakip ang dakbayan sa ilang programa diin dako kaayo og ikatabang sa syudad.

Niini, ang maong MOA ug DoD giduso sa komite ni Abaday ngadto sa komite sa pamalaod ug reglamento alang sa dugang pagtuon ug rekomendasyon.

Ang tigom sa komite gitambongan nila ni Konsehal John Michael Seno, Yvy Emano ug Aga Suan.