Dugang benepisyo madawat sa taga-City Hall

Hayan makatagamtam sa dugang kaarangan sa kinabuhi ang mga opisyal ug kawani sa City Hall.

Kini human giuyunan sa konseho sa syudad sa gipahigayong special session sa milabayng bulan nga gidumala ni Presiding Officer Protempore Konsehal Edgar Cabanlas ang Supplemental Budget No. 5 sa 2022 General Fund ug Local Economic Enterprises nga mobalor og P51.72 milyones kapin.

Ang maong pundo gamiton alang sa pagtunol og dugang tag-P10 mil nga Service Recognition Incentive (SRI) sa tanang mga opisyal ug kawani sa City Hall.

Dugang gigahinan sa konseho mao ang Rice Assistance balor P1,200.00 matag kawani pinasubay sa Malacañan Palace Administrative Order No. 01 ug 02 . Makadawat sa maong benepisyo ang tanang kawani, job order ug consultants sa City Hall.

Ang pagtunol sa maong mga benepisyo nunot sa gitinguha ni Mayor Klarex Uy ug Bise Mayor Bebot Rodriguez nga pag-ila sa tiunay nga serbisyong gitanyag sa mga kawani sa City Hall ngadto sa katawhan ilabina niining panahon sa pandemya.