Dugang benepisaryo sa socialized housing natunolan sa titulo sa lote

Dili matukib ang gibati nga kalipay sa 17 ka mga benepisaryo sa socialized housing project sa syudad nga nanimuyo sa Macanhan BLISS, barangay Carmen ning syudad human ilang nadawat ang titulo sa gipuy-ang lote sulod sa kapin 40 ka tuig.

Sa mensahe ni Mayor Rolando “Klarex” Uy atol sa gihimong pagpakayab sa nasudnong bandila niadtong Martes, iyang gipasalamatan ang konseho ilabina ang komite sa urban and rural poor and housing development ni Konsehal Edgar Cabanlas ingon man ang Task Force Emancipation for Piso Piso Beneficiaries ubos ni Engr. Armen Cuenca sa paningkamot nga maangkon sa mga benepisaryo sa socialized housing program ang gidamgong mga titulo sa yuta.

Niini, si Konsehal Edgar Cabanlas malaumon nga daghan pang mga benepisaryo ang matunolan sa titulo sa lote tungod kay usa kini sa maayong programa sa kagamhanan ang pagtabang sa mga kabus nga walay insaktong pinuy-anan.