Dugang allowance sa 2 mil kapin ka mga magtutudlo gigahin

Dugang kaarangan sa kinabuhi sa kapin 2 mil ka mga magtutudlo sa sekondarya dinhi sa dakbayan sa Cagayan de Oro ang gilantawng matagamtaman karong tuiga.

Kini human gipundohan gikan sa Special Education Fund (SEF) ang dugang allowance alang sa 2,114 ka mga magtutudlo sa sekondarya nga mobalor og P12,714,000.00.

Gipundohan usab sa balor P1.35 milyones ang pagtunol og Hardship Allowance sa 158 ka mga magtutudlo sa sekondarya.

Si Konsehal Suzette Magtajas-Daba, chairman sa komite sa edukasyon, mibutyag nga ang maong programa gigahinan ubos sa SEF “Allowance to Secondary Teachers” nga nasukip sa giaprobahang 2023 Annual Investment Plan (AIP) sa kagamhanan sa dakbayan.

Niini, mipasalamat si Konsehal Suzette sa administrasyon ni Mayor Klarex Uy sa padayong paglantaw sa kaayuhan sa mga magtutudlo nga walay mapihig sa itunol nga serbisyo alang sa kaarangan sa kinabuhi.

Dako kaayo ang papel sa atong mga magtutudlo dinha sa pagpanday sa kaugmaon sa kabataan aron maangkon ang kaarangan sa ilang kinabuhi, pamahayag ni Konsehal Suzette Magtajas-Daba.