DPWH gihangyo makonsidera mulo sa lot-owners dihas Canitoan-Ocon

Kusganong gihangyo ni konsehal Zaldy Ocon chairman sa komite sa engineering and infrastructure sa konseho nga temporaryo unta nga mapahunong ang ilang proyekto nga By-Pass and diversion road- CDO new western diversion road canitoan coastal section sa Department of Public Works and Highways (DPWH-10) sa katuyuan nga mapa-abot ug mapaminaw sa kadagkuan sa DPWH ang mulo sa mga tag-iya sa lote nga na-igo sa proyekto.

Kini ang unod sa special report ni konsehal Ocon atol sa sesyon ni-adtong lunes nga gidumala ni bise mayor kikang Uy.

Giklaro ni Ocon nga wala siyay pagsupak sa maong proyekto gani matud niya nga dako kini og makatabang nga mapalambo ang ekonomiya sa syudad.

Apan ang iya lamang gikatingala kay wala masunod sa DPWH ang ilang orihinal nga plano nga diin adunay na-igo nga mga pribadong lote nga wala sila mapahibalo.

Nunot niini gisugyot ni Ocon nga malingkoran sa iyang komite og dapiton ang mga opisyal sa DPWH ug ang tag-iya sa lote nga na apektuhan sa maong proyekto.