DOH Admin Order hingpit nga gipatuman

GIPAHIGAYON ang pagsusi sa mga parmasya ug botika dinhi sa syudad aron masuta ang gipatumang presyo sa mga tambal.

Mao kini ang gibutyag ni Konsehal George Goking, Chairman sa Komite sa Trade and Commerce, human gihimo ang surprisang pagbisita subay sa Administrative Order 2022-0015 sa Department of Health (DOH), Department Circular No. 2022-0372 ug Department Circular No. 2022-0612.

Kuyog sa maong pagsusi ang kadagkoan sa Department of Health, Department of Trade and Industry (DTI), City Price Coordinating Council ug komite ni Goking. Tumong niini nga mabantayan ang presyo sa mga tambal ug mapatuman sa hingpit ang gilatid nga suggested retail price o SRP.

Niini, si Goking mihangyo nga unta magiyahan usab sa mga parmasya ang mga pumapalit kabahin sa mga generic ug branded nga tambal tungod kay kini adunay dakong kalainan sa presyo apan parehas lang ang epekto sa panglawas.