Diversion road dihas Gusa paingon sa Bulua wala pa makompleto –RTA

WALA pa makompleto ang pagtrabaho sa diversion road gikan sa Gusa paingon sa Bulua agi sa Agora ug Puntod-Kauswagan Bridge.

Mao kini ang gibutyag sa kadagkoan sa Roads and Traffic Administration (RTA) human gituki ang taho ni Konsehal Roger Abaday kalabot sa piniling pagpaggamit sa nahisgotang dalan ngadto sa mga motorist.

Sa milabayng tigom sa Komite sa Roads and Traffic Management ni Konsehal Romeo Calizo, gipasabot nga aduna pay wala mahuman sa pagtrabaho sa maong dalan hinungdan nga wala pa kini matunol sa kontraktor ngadto sa Department of Public Works and Highways (DPWH).

Ang gihatagan sa panugot nga maka-agi sa maong dalan kadtong mga dagkong truck nga padayong nagkarga sa gikinahanglang materyales aron matrabaho ang dalan ug dili kay gipihig ang mga motorista, dugang pasabot sa kadagkoan sa RTA.

Niini, si Calizo nanawagan sa mga motorista nga naglaraw sa paggamit sa maong dalan sa pagsabot samtang padayon kining gitrabaho ug maghulat nga makompleto kini aron magamit nga alternatibong dalan gikan sa este paingon sa westeng bahin sa syudad.