Demolisyon sa mga nanimuyo dihas Camp Evangelista gihangyong mauktaba

GIHIMO na sa konseho sa syudad ang tanan aron matabangan ang mga residente nga nanimuyo sulod sa Camp Evangelista sa barangay Patag.

Mao kini ang gibutyag ni Konsehal Edgar Cabanlas, chairman sa komite sa urban poor, atol sa milabayng tigom.

Gani, matod niya, gipasaka sa konseho ang resolosyon nga naghangyo sa opisina sa presidente sa nasud ug opisina sa National Defense nga naghanyo nga mahatag kanila ang maong lote tungod sa kadugayon na nilang nanimuyo sa dapit apan subo kaayo kay gibasura man ang maong hangyo.

Gipasabot nga ang loteng gitukuran sa panimalay sa mga sibilyan dinha sa kampo dili gayud mahatag kanila tungod kay gideklara kining military reservation.

Si Cabanlas mipadayag sa iyang kabalaka sa gipakanaug nga Writ of Demolition ni Judge Candida Casiño sa Branch 10 sa Regional Trial Court - Misamis Oriental.

Niini, ang komite subling maghangyo sa Malacañang ug Department of National Defense (DND) ingon man sa kadagkuan sa AFP nga maghimo sa ilang kaugalingong relocation plan.

Kini, dugang sa gipasakang resolosyon nga maghanyo sa korte nga ma-uktaba sulod sa duha ka bulan ang demolisyon.

Alayon niini, gitahasan ni Cabanlas ang opisina sa City Housing and Urban Development Department (CHUDD) nga makig-koordinar sa 4ID Philippine Army alang sa pagpahigayon og socio economic survey aron makuha ang mga lehitimong apektadong pamilya.

Malaumon si Cabanlas nga pinaagi sa joint effort sa local government unit ug sa mga opisyal sa 4ID makab-ot ang solosyon sa maong problema.