Deadline pagbayad sa business permits gilugwayan sa konseho

MAHIMO pang makabayad  kutob  Marso 31 ning tuig  sa renewal sa  ilang business permits/license sa mga negosyante sa publikong kamerkaduhan sa syudad.

Kini human ang Konseho sa sesyon niadtong Lunes nga gidumala ni Bise Mayor Bebot Rodriguez mipalabang sa odinansa nga naghatag  og 1 ka bulan nga lugway  sa pagbayad sa ilang buluhisan  gikan Pebrero 29 ngadto sa Marso 31.

Sayu pa niini, si Acting Department Manager Mary Sean Molig sa City Economic Enterprises And Business Development Administration (Ceebda) mihangyo   malugwayan  ang  pagbayad sa business permits nunot sa hangyo sa mga  mamagliyaay sa kamerkaduhan sa rason nga nihit  ang ilang kinitaan gawas  nga tingbayad usab sa  tuition fee sa ilang mga estudyante.

Ang ordinansa nga gipalabang sa konseho alang sa maong katuyoan  gipaluyohan sa Komite sa Economic Enterprises ni Konsehal Yan Lam Lim, Komite sa Ways and Means ni Konsehal George Goking ug Komite sa Pamalaod ug Reglamento ubos ni Konsehal Edgar Cabanlas.