De kalidad nga edukasyon padayong ipatuman

HAYAN makaangkon sa de kalidad nga edukasyon ang pipila ka kabataan sa barangay Kauswagan.

Kini ang unod sa taho nga gisumete sa DPWH-Region 10 ngadto sa buhatan ni Bise Mayor Kikang Uy diin gibutyag nga nakompleto na ang pagtrabaho sa tulo ka andanang gambalay nga adunay siyam ka lawak saringan sa Kauswagan Central School ug upat ka andana nga adunay 16 ka lawak saringan nga edifisyo alang sa Kauswagan National High School.

Niini, si Konsehal Suzette Magtajas-Daba, chairman sa Komite sa Edukasyon, mipasalamat sa kagamhanan ubos ni Mayor Oscar Moreno kinsa padayong naghatag og prioridad sa natad sa edukasyon taliwala sa hagit sa pandemya.

Matod sa konsehal nga wala mihunong ang kagamhanan sa paglantaw nga walay kabataang mapihig sa pag-angkon sa maayong edukasyon kay ang mahuptan nga edukasyon ang isa sa makapabuntog sa kapobrehon aron makaangkon ang dugang kaarangan sa kinabuhi.

Ang maong edifisyo dili lamang dako og ikatabang aron maangkon ang de kalidad nga edukasyon sa kabataan dili lamang sa Barangay Kauswagan kun dili lakip na sa mga kasikbit nga dapit ilabina sa panahon nga manumbalik na ang face to face classes.