Data sharing pact tali’s CDO, DSWD-10 giuyonan sa Konseho

GIUYONAN na sa Konseho sa Syudad ubos ni Bise Mayor Bebot Rodriguez ang kasabutan nga naglatid sa pagpa-ambit sa kagamhanan sa dakbayan sa mga datos ngadto sa rehiyonal nga buhatan sa Department of Social Welfare and Development (DSWD-10) alang sa pagpatuman sa National Household Targeting System for Poverty Reduction (NHTS-PR) kun Listahanan 3.

Ang kasabutan alayon sa probisyon sa Data Privacy Act, National Privacy Commission Policy ug uban pang susamang balaod nga nagdili sa pagpagawas sa mga sensitibong impormasyon.

Niini, ang DSWD-10 adunay kaakuhan isip personal information controller alang sa tanang personal data nga maproseso ubos sa Listahanan ug moproseso ug magpa-ambit sa maong mga datos ngadto sa kagamhanan sa dakbayan aron magamit sa pagpatuman sa programa.

Samtang ang kagamhanan sa dakbayan adunay kaakuhan nga magsilbing personal information controller ug protektahan ang mga datos nga ipaambit sa DSWD-10. Ang dakbayan gitahasan usab sa pagsumete og periodic feedback ngadto sa DSWD-10 kun paunsa gigamit ang gipaambit nga mga datos sa Listahanan.

Si Konsehal Girlie Balaba, Chairman sa Komite sa Social Services, malaumon nga sa pirmahang kasabutan mapadali ang pag-ila sa mga mamahimong benepisaryo sa social programs sa kagamhanan sa dakbayan.