Dahino nagtuon sa laraw mapalapdan gitukod nga Oro Energy Efficiency Office

SI Konsehal Edna Dahino, chairman sa komite sa panalapi, padayong nagtuon sa laraw pagpalapad sa gimugnang City Energy Efficiency and Conservation Office (CEECO).

Kini human ang buhatan sa City Legal misumete sa ilang panahom ug rekomendasyon sa gidusong sugyot ordinansa nga magmugna sa CEECO ug maghan-ay sa tahas, buluhaton, mga kawani ug gahin alang sa operasyon niini.

Mahinumduman nga subay sa Energy Code of Cagayan de Oro City gimugna ang CEECO sa tinguha nga adunay maghan-ay ug mag-umol sa mga giya ug patakaran dinha sa pagpatuman sa energy efficiency ug conservation plans ug programs.

Ang maong lakang pinasubay sa RA No. 11234 nga nag-establisar sa Energy Virtual One-Stop Shop (EVOSS) aron mapasayon ang proseso sa pagkuha sa permit alang sa mga proyekto sa power generation, transmission ug distribution.

Ang sugyot ordinansa gipangamahanan ni kanhi Konsehal Bong Lao uban ni Konsehal Edna Dahino.