Daba nagpasalamat sa padayong pagtukod sa GRSHS

SI Konsehal Suzette Magtajas-Daba, Chairman sa Komite sa Edukasyon, kusganong nagpasalamat sa administrasyon ni Mayor Klarex Uy sa padayong pagtukod sa bag-ong edifisyo nga hitsas og pasilidad nga adunay 16 ka lawak saringan diha sa Gusa Regional Science High School (GRSHS).

Kini ang mensahe ni Konsehal Daba atol sa mass induction program diin siya ang nagrepresentar ni Mayor Uy ug mipahurar sa bag-ong napili nga mga opisyal sa School Parents Teachers Association (SPTA), School Governance Council (SGC), Home Room Parents Teachers Association (HRPTA), Supreme Student Government (SSG), School Class Officers ug School Clubs Officers, niadtong milabayng adlaw.

Dugtong ni Daba nga ang bag-ong edifisyo gilantaw nga makahatag og kahamugaway ug de-kalidad nga edukasyon ngadto sa mga tinun-an sa maong tunghaan.

Gipasalamatan usab ni Daba si Mayor Klarex Uy tungod sa gitukod nga Covered Court kay dako kaayo kini og ikatabang sa pagpahigayon sa ilang mga programa ug kalihokan.

Mainiton usab nga gipahalipayan ni Konsehal Daba ang mga opisyales ug miyembro sa matag kapunongan dala ang panghinaot sa kanunay nga panaghiusa ug kooperasyon aron makab-ot ang tumong ug gitinguha nga mapalambo ang mga programa ug proyekto alang sa kabataan sa maong tunghaan.