Daba nagpasalamat sa malampusong City Scholars’ Cup

KUSGANONG nagpasalamat si Konsehal Suzette Magtajas-Daba, chairman sa komite sa edukasyon,  sa kalamposan sa gipahigayong Scholars Cup 2025 sa miaging semana diha sa Xavier University Gymnasium, ning syudad.

Ang tinuig nga programa sa kagamhanan nga giandam alang sa mga Iskolar sa Dakbayan kon IsDa gipasiugdahan sa buhatan sa City Scholarships Office-City Education and Development Department.

Tumong sa maong kalihokan nga mapakita ang talento ug abilidad sa mga iskolar diha sa paugnat sa kusog ug sa tinguha sa panaghiusa sa mga iskolar.

Gitumong usab kini aron madiskobre ang ilang tagsa-tagsa nga potensyal sa lainlaing natad sa sports.

Nasayran nga ang kalihokan gilangkoban sa mga dula sa Basketball, Volleyball, Mind Games, E-Games, mga Larong Pinoy, talent expo ug cheer chant competition.

Gipasalamatan usab ni Daba si Mayor Klarex Uy sa pagmugna sa maong cup ubos sa pagdumala ni City Scholarships Office Head Richel Petalcurin-Dahay uban sa mga ginikanan nga nagboluntaryo aron makab-ot ang kalampusan sa talagsaon nga kalihokan.  

Gipahalipayan usab ni Konsehal Daba ang tanang Iskolar sa Dakbayan sa ilang kakugi, kadasig ug dedikasyon pinaagi sa pagsalmot sa tanang mga dula. (RNQuiblat/SP/Photo grabbed from CDO City Scholarships Office)