Daba nagpahinumdom sa pagsumite sa kompletong rekisitos sa 2025 City Scholarship Program

SUBLING nagpahinumdom si Konsehal Suzette Magtajas-Daba, chairman sa komite sa edukasyon, ngadto sa tanang nagmalamposon pag-apply sa online application sa 2025 College City Scholarship program nga kinahanglan kumpletohon gayod ang ilang rekisitos aron makakuha og eksaminasyon.

Gipasabot sa konsehal nga kadtong aplikante lamang nga malamposon nga nagsumite sa ilang online nga aplikasyon ang kwalipikado nga magsumite sa gikinahanglang dokumento pinaagi sa online form bit.ly/ISDASubmit2025 nga hangtod lamang sa Marso 17, ning tuig.

Nasayran nga adunay 8,053 ka aplikante gikan niadtong Pebrero 3 human giablihan ang pagpangdawat sa aplikasyon ug mitak-op niadtong Marso 3, 2025.

Matod ni Daba nga ang kagamhanan migahin og igong pundo alang sa maong programa ug kasamtangan adunay kapin 15 mil ka iskolar ang dakbayan sa Cagayan de Oro.

Dako kini nga kahigayonan sa mga tinun-an nga kun mapili silang benepisaryo sa maong programa, makahuman gayud sila sa ilang pag-eskwela nga maghatag kanila og hayag nga kaugmaon, dugang sa konsehal.

Alang sa dugang detalye ug kasayoran, mahimong bisitahan ang FB page CDO City Scholarships Office o motawag sa numero 0929-819-0819. (RNQuiblat/SP)