Daba mipahalipay sa mga magtutudlo

“ANG inyong paggiya, kaalam, ug dedikasyon mao ang magtultol sa hustong dalan sa kabataan aron mamahimong mabungahong indibidwal sa pamilya ug sa katilingban.”

Kini ang gipadayag ni Konsehal Suzette Magtajas-Daba, Chairman sa Komite sa Edukasyon, nunot sa kasaulogan sa National Teachers’ Day nga nagdala sa temang: Valuing Teacher Voices: Towards a New Social Contract for Education”.

Ang kalihokan gihimo pinasubay sa RA 10743 nga nagdeklara sa Oktubre 5 matag tuig isip Adlaw sa mga Magtutudlo sa tibuok nasud.

Tumong niini nga mapasidunggan ug maila ang kahalangdon ug kamahinungdanong tahas ug dedikasyon sa mga magtutudlo dinha sa pagmatuto sa kabataan nga makab-ot ang kaugmaran sa ilang kinabuhi.

Diha sa kasaulogan matag tuig mabuhi ang imahe ug respeto sa pagtudlo isip usa ka bokasyon pinaagi sa pagpakatap sa kahibalo ngadto sa publiko sa kabililhon sa mga magtutudlo diha sa katilingban, pasabot ni Daba.

Niini, si Daba kusganong mipahalipay sa tanang mga magtutudlo sa nasud ilabina dinhi sa dakbayan sa Cagayan de Oro sa pagsaulog sa Adlaw sa mga Magtutudlo. Kamo ang among bayani ug pundasyon sa among kaugmaon. Ang akong dakong pagsaludo ug daghang salamat, teachers,” panapos ni Konsehal Suzette Magtajas-Daba.