Daba mipahalipay sa mga magtutudlo

“ANG akong dakong pagsaludo ug pahalipay sa tanang mga magtutudlo sa nasud ilabina dinhi sa dakbayan sa Cagayan de Oro sa pagsaulog sa Adlaw sa mga Magtutudlo.”

Mao kini ang gipadayag ni Konsehal Suzette Magtajas-Daba, Chairman sa Komite sa Edukasyon, nunot sa kasaulogan sa National Teachers’ Day nga nagdala sa temang: “Together 4 Teachers Signifying the 4As of Gratitude: Appreciation, Admiration, Approval and Attention.” Ang kalihokan pinasubay sa RA 10743 nga nagdeklara sa Oktubre 5 matag tuig nga Adlaw sa mga Magtutudlo sa tibuok nasud.

Tumong niini nga mapasidunggan ug maila ang kahalangdon ug gibug-aton sa mahinungdanong tahas ug dedikasyon sa mga magtutudlo dinha sa pagtabang sa kabataan nga makab-ot ang kauswagan sa ilang kinabuhi.

“Diha sa kasaulogan mabuhi ang imahe ug respeto sa pagtudlo isip usa ka bokasyon pinaagi sa pagpakatap sa kahibalo ngadto sa publiko sa kabililhon sa mga magtutudlo sa katilingban,” pasabot ni Daba.

Niini, siya miingon nga gikinahanglan nga malantaw ang kamahinungdanon sa tahas sa mga magtutudlo kinsa nag-amuma sa kabataan aron mapalambo ang edukasyon kay dinhi mapalig-on ang pagkab-ot sa dugang kaarangan ug kalamboan sa komunidad ug sa nasud.

“Ang inyong paggiya ug kaalam, dedikasyon mao ang magtultol kanamo sa hustong dalan nga mamahimong mas maayo ug mabungahong indibidwal sa pamilya ug sa katilingban. Kamo ang among bayani. Daghang salamat, teachers,” panapos ni Konsehal Suzette Magtajas-Daba.