Daba miagni sa tanan sa pag-apil sa Brigada Eskwela 2024

ANG suporta ug partisipasyon sa mga stakeholders mahinungdanon kaayo sa pagsiguro nga ang atong mga estudyante diha sa matag tunghaan luwas ug adunay maayong palibot.

Kini ang pamahayag ni Konsehal Suzette Magtajas-Daba, Chairman sa Komite sa Edukasyon, atol sa gihimong Stakeholder’s Pledge of Commitment alang sa pagpangandam sa Brigada Eskwela 2024 nga may tema: Bayanihan para sa Matatag nga Paaralan, Tara na Magbrigada na Tayo!

Ang Brigada Eskwela  magsugod karong adlawa ug molungtad hangtod Hulyo 27.

Gipangunahan sa Department of Education (DepEd) ang tinuig nga programa agig tubag sa isyu sa dili igo nga pagmentinar sa eskwelahan. 

Gipasabot usab ni Daba nga kini ang hiniusang pagpaningkamot alang sa pagpangandam sa mga eskwelahan sa dili pa magsugod ang klase lakip ang ginagmay nga pag-ayo sa mga lawak saringan, pagpintal, paglimpyo, pag-ayo sa mga muwebles ug uban pang kalihokan sa matag tunghaan.

Niini, hugot nga giaghat ni Konsehal Daba ang mga nagkadaiyang stakeholders, opisyal sa Parents-Teachers Association (PTA), ginikanan, civic groups, pribadong sektor, non-government organizations, magtutudlo, mga estudyante, ug uban pang pribadong indibidwal sa pag-apil sa Brigada Eskwela 2024.