Cugman NHS magamit sa dili madugay - Daba

GIKALIPAY ni Konsehal Suzette Magtajas-Daba, Chairman sa Komite sa Edukasyon, ang dugang kalamboan nga matagamtaman sa kabataan sa dakbayan sa Cagayan de Oro.

Kini human gipundohan sa Local School Board (LSB) ubos ni Mayor Klrex Uy ang mobalor P30 milyones alang sa pagtul-id sa naguba nga mga bintana, pag-instalar sa linya sa kuryente ug tubig, pagpalit sa mga bangko, lamesa, blackboard, pagpuli sa mga door knobs ug uban pang mga gamit diha sa Cugman National High School, ning syudad.

Mahinumdoman nga sa iyang taho atol sa sesyon sa konseho, gihingusgan ni Konsehal Imee Moreno nga mahatagan og pagtagad ang resulta sa iyang pag-inspeksyon sa nakitang kadaot sa upat ka andanang building nga adunay 42 ka lawak saringan sukad kini nahuman niadtong tuig 2022.

Niini, dako ang pasalamat ni Konsehal Suzette Magtajas-Daba sa administrasyon ni Mayor Klarex Uy sa paggahin sa kantidad aron mapahimoslan na sa mga magtutudlo ug mga tinun-an ang maong tunghaan.

Siya midugang nga dako usab kini ikatabang sa pagtubag sa kakulangon sa mga lawak saringan sa pagtaas sa mga enrolees sa dapit ug sa ingon mahatag ang dugang de kalidad nga edukasyon ngadto sa kabataan dala sa kahamugaway sa facilidad.