Cugman IS mamahimo nang magamit ning tuig tingtungha

DAKO ang kalipay ni Konsehal Suzette Magtajas-Daba, chairman sa komite sa edukasyon, nga hingpit nang mahatagan sa komportableng tunghaan ang mga kabataan sa Barangay Cugman.

Kini ang mensahe sa konsehal atol sa inauguration ceremony niadtong Marso 20, ning tuig sa bag-ong edifisyo sa Cugman Integrated School diin siya ang nagrepresentar ni Mayor Klarex Uy.

Matod ni Daba nga ang bag-ong edifisyo dili lang eksklusibo sa high school students tungod, kay karong school year 2025-2026, modawat na kini sa mga tinun-an sa kindergarten ug elementarya.

Dugtong sa konsehal nga ang pagtukod og dugang mga edifisyo makatabang sa pagtunol sa de kalidad nga edukasyon ngadto sa kabataan dili lamang sa barangay diin kini natukod kun dili lakip na sa kasikbit nga mga dapit.

Nagpasalamat si Konsehal Daba sa tanang sakop sa Local School Board ubos ni Mayor Klarex Uy, Department of Education (DepEd) sa panguna ni Schools Division Superintendent Dr Roy Angelo Gazo ug sa Konseho sa Barangay Cugman sa panaghiusa ug pagtinabangay aron mapundohan ug matibawas ang maong tunghaan.

Naglaom ang konsehal nga ang maong edifisyo makaaghat gayud sa mga kabataan nga maghuman sa ilang pagtungha kay anaa naman gayud sa ilang tugkaran ang eskwelahan. (RNQuiblat/SP/Photo by CIO)