COWD gidapit sa komite sa public works

Gidapit sa komite sa public works ni Konsehal John Michael Seno nga motambong sa tigom sunod semana ang kadagkoan sa Cagayan de Oro Water District (COWD).

Kini aron hisgutan ug mapaminaw ang ilang opinyon kalabot sa taho nga nagpahigayon kini og pagkalot sa dalan dihas dalan Osmeña duol sa 5N Glass Supply ug sa tuong bahin atubangan sa National Telecommunications Commission diha sa barangay Kauswagan nga walay road closure permit.

Gibutyag sa kadagkoan sa Roads and Traffic Administration (RTA) nga segun sa Article XXV, Section 176 sa Traffic Code sa syudad, supak sa balaod si bisan kinsang indibidwal o’ establisamento ug bisan sa mga kontraktor sa ahenysa sa gobyerno lokal man o’ national nga magkalot aron pag-instalar og water pipe, telecommunication lines, poste, drainage pipes ug ubang underground facilities diha sa kadalanan nga walay excavation permit gikan sa mga hintungdan ahensya sa gobyerno sama sa RTA.

Hinoon, gidugang nga panahon sa emerhensya, mahimong mopahigayon og pagkalot nga ang permit mahimong malokat sulod sa 3 ka adlaw sa tingtrabaho.