COWD angay motuman sa pasalig sa mga konsumedor – Esparcia

Panahon na nga hatagan sa katin-awan sa Cagayan de Oro Water District (COWD) ang tinuod nga hulagway sa problema sa supply tubig dinhi sa dakbayan.

Kini ang panawagan ni Konsehal Bernie Esparcia atol sa milabayng tigom sa komite sa public utilities nga gidumala ni Konsehal Romeo Calizo human gituki ang sulat sa Muslim-Christian Homeowners Association nga nangayo og tabang kalabot sa ilang problema sa panubig diha sa Sitio Singapore, Phase 2, Barangay Balulang.

Sa maong tigom, gisaysay sa mga sakop sa kapunungan nga dugay na silang nag-antos sa problema sa kakulangon sa supply sa tubig ug hangtod sa kasamtangan nagkadaghan na ang mga molopyo wala gihapon kini mahatagi sa kasulbaran.

Hinuon, gipahibalo sa kapunungan ngadto sa komite nga bag-o lang nga nasusi sa Engineering Department sa COWD ang ilang dapit ug nagpasalig nga ilang paningkamotan ang pagbutang og extension sa linya ug magbutang usab og mga sub-outs aron katong mga meter sa unang linya didto na makutay.

Niini, nanghinaot si Esparcia nga mapatuman gayud sa syudad ang angayang mga lakang aron maimplementar sa Water District ang ilang mga saad ug pasalig ngadto sa ilang mga konsumedor.