Covered court matukod dihas Baikingon Elem. School

DUGANG kalamboan ang gilantaw nga matagamtaman sa kabataan diha sa Barangay Baikingon. Kini human gipundohan sa kagamhanan sa dakbayan ang proyekto nga mobalor kapin sa P10 milyones alang sa pagtukod sa covered court nga adunay stage ug bleachers diha sa Baikingon Elementary School.

Kini ang kauban sa mga proyektong nasukip sa giaprobahang 2024 Supplemental Annual Investment Program (SAIP) No. 1 sa konseho sa sesyon niadtong Lunes nga gidumala ni Bise Mayor Bebot Rodriguez.

Niini, dako ang pasalamat ni Konsehal Suzette Magtajas-Daba, Chairman sa Komite sa Edukasyon, sa administrasyon ni Mayor Klarex Uy sa padayong paglantaw nga wala’y mapihig sa itunol nga serbisyo alang sa dugang kalamboan sa mga kabataan sa dakbayan.

Siya mipasabot nga ang maong edipisyo dako og ikatabang dili lamang sa mga kabataan ug magtutudlo lakip na ang tibook barangay nga ilang magamit sa ilang mga kalihokan.