Coral farming hinay-hinay nang nasugdan – Achas

“MAAYO ang lakaw sa atong (Komite sa) Fisheries. Gani ang atong adbokasiya karun sa kadagatan, maglunsad kita og gitawag nga coral farming.”

Kini ang gibutyag ni Konsehal Rustico Achas, Chairman sa Komite sa Fisheries and Aquatic Resources, sa iyang pakighinabi sa mga sakop sa prensa mahitungod sa adbokasiya sa iyang komitiba arun ma-revive ang mga corals diha sa mga coastal barangays.

Matud ni Achas, duha ka semana na ang milabay gikan sa pagbutang og mga artificial reef modules sa coastal area sa Puerto arun maoy puy-an sa mga isda sa mabaw’ng bahin sa dagat.

Base sa obserbasyon ug pagmonitor sa mga anglers ug mamanaay sa maong dapit, daghan nang mga isda ang makita ug gapangitlog na usab ang nokus sa mga artificial reefs.

Ang maong lakang gihingusgan sa iyang komite, inubanan sa Agricultural Productivity Operations Office (APPO) ug Bureau of Fisheries and Aquatic Resources (BFAR), agig tubag sa problema sa mga fisherfolk nga mangisda pa sa lawod arun lamang makakuha og dagko nga isda.

Nasayran nga laing hugna sa maong proyekto ang ibutang usab sa Barangay Tablon.

Si Konsehal Achas malaumon nga ang maong proyekto sa coral restoration nga nasugdan na sa distrito dos ma-implementar gayod sa tibook sa syudad.