Container gardening gisugyot ni konsehal Pascual

DAKO ang kalipay ni Konsehal Jay Roa Pascual, chairman sa komite sa turismo ug agrikutura nga namugna ang Gulayan sa Paaralan Program alang sa dugang kaarangan sa kabataan.

Mahinumdoman nga sa miaging semana gipirmahan ni Mayor Oscar Moreno ang Memorandum of Understanding (MOU) tali sa kagamhanan ug Department of Education (DepEd) nga naglangkob sa hingpit nga pagpatuman sa maong programa diha sa mga tunghaan.

Ang konsehal mibutyag nga sa maong programa dili lamang sa pagpananom ang ilang makat-onan apan matodloan usab sila kun unsaon nga mapuslan og maminosan ang basura nga anaa sa ilang tagsa-tagsa ka panimalay.

Gipasabot sa konsehal nga mahimo nilang i-apply ang ilang nakat-onan pinaagi sa paghimo og container gardening gamit ang mga empty plastic bottles ug uban pa nga pwedeng magamit sa pangtanom og mga utanon samtang anaa ra sila sa panimalay.

Ang abot sa ilang pagpananom dako kini og ikatabang ning panahon sa pandemya kay makadugang kasegurohan diha sa ilang pang-adlaw-adlaw nga pagkaon sa pamilya, pamahayag ni Konsehal Pascual.

Niini si Konsehal Pascual naglaum nga daghang kabataan ang madasig sa pagpananom ug mipasalamat sa kagamhanan sa dakbayan, DepEd ug Department of Agriculture (DA) sa pagmugna ning maong programa.