City Hall gitahasan mokolekta sa fire safety inspection fees

MAPALAPDAN pa ang pagpatuman sa kagamhanan sa dakbayan sa balaod nga naghan-ay sa mga giya ug patakaran aron mapasayon ang pagproseso sa paglukat sa business permits ug licenses.

Kini human ang Konseho sa syudad ubos ni Bise Mayor Kikang Uy mihatag sa katungod ni Mayor Oscar Moreno pagpirma sa Memorandum of Agreement (MoA) tali sa Bureau of Fire Protection (BFP) alang sa pagpatuman sa pipila ka probisyon sa RA 11032 kon Ease of Doing Busines and Efficient Government Service Delivery Act of 2018.

Ubos sa implementing rules and guidelines sa balaod, ang mga lokal nga kagamhanan gitahasan nga mamahimong collecting agents sa Fire Safety Inspection Fees (FSIF) alayon sa pagproseso sa mga business-related fees sa mga kliyente sa ahensya.

Ang FSIF balayronon nga gipahamtang alang sa pagpahigayon og fire safety inspection nga mobalor og 15 porsyento sa tanang pagabayaran sa paglukat sa business permit nga gipahamtang sa lokal nga kagamhanan apan dili mominus sa P500.00.

Niini, si Konsehal Romeo Calizo, chairman sa komite sa Public Order and Safety, mibutyag nga pinaagi sa maong MoA mahatagan sa kasayon ang mga magpapatigayon dinha sa paglukat sa ilang business permit tungod kay diha naman tanan sa buhatan sa City Treasurer ang pagbayad ug dili na kinahanglang moadto pa sa lain laing ahensya sa gobyerno.