City College gimugna sa konseho

Dugang kalamboan sa natad sa edukasyon ang gilantaw nga matagamtaman sa mga Kagay-anon.

Kini human gimugna sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang City College of Cagayan de Oro.

Ang ordinansa nga gipalabang alang sa maong katuyuan naglakip sa tinguha pagmugna sa korporasyon, naglatid sa pagdumala, katungdanan ug responsibilidad sa governing board ug naghatag sa educational ug professional training.

Ang pasiunang gilatid nga mga kurso nga itanyag sa kolehiyo mao ang Bachelor of Science in Agriculture (BSA), Bachelor in Science in Information System (BSIS), Bachelor of Science in Entrepreneurship (BSE), Bachelor of Science in Environmental Science (BSES), Bachelor of Science in Sanitary Engineering (BSSE), Bachelor of Science in Industrial Security Management (BSISM) ug uban pang undergraduate courses kun gikinahanglan.

Samtang sa Technical-Vocational Education and Training programs, gilaraw nga itanyag ang Agriculture, Fisheries, and Forestry; Construction; Creative Industries; IT-BPO; Health, Wellness and Other Social Services; Tourism, Hotels and Restaurants ug Ladderized Diploma Programs samtang alang sa Specialized Trainings kini naglakip sa Micro-Certificates on Emergent Technologies sama sa Artificial Intelligence, Data Science Analytics, Cybersecurity, Internet of Things ug Cloud Computing ug uban pang specialized training kun gikinahanglan.

Si Konsehal Suzette Magtajas-Daba, chairman sa komite sa edukasyon ug nangamahan sa gipalabang nga ordinansa, mibutyag nga subay sa gihimong feasibility study nakita nga makatabang ang pagmugna sa City College dinha sa pagkab-ot sa dugang kaarangan sa kinabuhi sa katawhan sa dakbayan.

Niini, mokabat sa P110 milyones ang pasiunang gigahin sa konseho sa syudad alang sa pagtukod ug operasyon sa maong institusyon. Siya midugang nga ang maong proyekto dako gyud og ikatabang ilabina sa mga tinun-an sa bukid nga bahin sa syudad tungod kay duol naman sa ilang mga pinuy-anan. Ang ordinansa nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Ed Cabanlas.